Bugungi kunda raqamli texnologiyalar nafaqat kundalik faoliyatimizda, balki ijtimoiy-iqtisodiy, ishlab chiqarishda, soliq tizimida, sog‘liqni saqlash tizimida, ta’limda, bank va moliya sohasida hamda Davlat boshqaruvida ularsiz tasavvur qilib bo‘lmaydi. Shuning uchun raqamli texnologiyalarni barcha sohalarga joriy qilish va mavjud axborot tizimlarni modernizatsiya qilishda mutaxassislarni jalb qilish hamda raqobatbardosh kadrlar tayyorlash muxim hisoblanadi.

“Raqamli texnologiyalar konvergensiyasi” kafedrasi 2023-yil 31-avgustdagi 9(731)/1(732)-sonli universitet Kengashi qarori asosida “Axborot texnologiyalari” va “Pochta aloqasi texnologiyasi” kafedralari birlashtirilib tashkil qilingan. Kafedraning maqsadi murakkab axborot tizimlarini loyihalash, ishlab chiqish, integratsiya qilish, sinovdan o‘kazish uchun zarur bo‘lgan nazariyalar, eng yangi vositalar hamda texnologiyalarni o‘zlashtirgan kadrlarni tayyorlashga qaratilgan.

Kafedra raqamli texnologiyalarning turli sohalarini qamrab olgan dasturlarni taklif etadi. Bu dasturlar orasida kompyuter fanlari, axborot tizimlari, katta hajmli ma’lumotlarga ishlov berish, ma’lumotlar bazasi boshqaruvi va bulutli texnologiyalar kabi kurslar mavjud. Har bir dastur, nazariy bilimlarni amaliyot bilan uyg‘unlashtirishga qaratilgan.

Kafedra o‘z sohasida ilg‘or tadqiqotlar olib boradi. Bu tadqiqotlar raqamli texnologiyalarning yangi qo‘llanilish sohalarini ochishga, shuningdek, sohani rivojlantirishga qaratilgan. Talabalar va professor-o‘qituvchilar, innovatsion loyihalarda ishtirok etish orqali sohadagi eng yangi tendensiyalar va texnologiyalarni o‘rganishadi.

Kafedra jamoasi, o‘z sohasida katta tajribaga ega bo‘lgan o‘qituvchilardan iborat. Ular talabalarga eng yangi bilimlarni o‘rgatish bilan birga, ularning shaxsiy va kasbiy rivojlanishlarida ham yordam beradi.