Ҳурматли институтимиз талабалари, уларнинг ота-оналари ҳамда институт жамоаси!

Сўнгги кунларда ISFT институтини Тошкент вилояти Қибрай тумани Университет кўчаси 2-уйдан мажбурий чиқариш бўйича Ўзбекистон Республикаси Бош прокуратураси ҳузуридаги Мажбурий ижро бюросининг Талабномаси тарқалиши орқасидан ижтимоий тармоқларда турли фикрлар ва мунозаралар билдирилиб, уларнинг асосий қисми ушбу ҳолат бўйича аниқ вазиятни акс эттирмайди ҳамда турли консперилогик хусусиятга эга.

Юқоридагиларни инобатга олиб, ISFT институти Раҳбарияти мазкур вазият бўйича барча саволларга аниқ асослантирилган жавобларни беришни лозим деб ҳисоблади.

Биринчидан, Мажбурий ижро Талабномаси ISFT институти ва Аграр университети ўртасидаги мулкий низо масаласи бўлиб, бу мавзу ISFT институтининг фақат битта ўқув биносига таалуқли. (Хабарингиз бор ISFT институти бир неча биноларда фаолият юритади.)

Хусусан, бу борада бир неча йил аввал Тошкент давлат аграр университети ҳудудидаги қаровсиз, ташландиқ бинони ўша пайтда тузилган шартномага асосан ISFT институти таъмирлаб замонавий кўринишга келтириб фаолият кўрсатиб келаётганди. Бугунги кунга келиб, ушбу бино бўйича ижара шартномасини муддатидан олдин бекор қилиш масаласи Аграр университети томонидан кўтарилган бўлиб, суд тартибида кўриб чиқилган.

Суд қарорига кўра, ISFT институти томонидан қилинган харажатлар Аграр университети томонидан тўлиқ қоплаб берилиши ҳамда ISFT институти ушбу бинодан чиқиб кетиши белгиланган. Юқоридаги Мажбурий ижро талабномаси суд инстанциялари бири якуни ҳисобланади.

Маълумот ўрнида, ISFT институти ҳали суд жараёни бўйича бошқа инстанцияларга даъво ариза киритган. Бундан ташқари, ISFT институти фойдасига қарздорликларни ундириш бўйича Мажбурий ижро томонидан Аграр университетининг барча ҳисоб рақамларидаги пул маблағлари музлатилган.

Ушбу фикрлар асоси сифатида, бугунги кунда Мажбурий ижро талабномасидан кўрсатилган 18 феврал санаси ўтган бўлсада, ўқув жараёнлари белгиланган тартибда мазкур бинода давом этаётганини кўришингиз мумкин.

Иккинчидан, ISFT институти бир неча ҳудудлардаги биноларда фаолият юритиб, юқоридаги суд инстанциялари қандай тарзда якунланишидан ташқари, ўз талабаларини ўқитиш имокониятига эга.

Бу фикр институт лицензиясида кўрсатилган манзиллардаги биноларнинг сиғими орқали ўз исботини топади.

Учинчидан, ISFT институти олий таълим бериш лицензияси талабларига мувофиқ ўз фаолиятини ташкил этган бўлиб, юқоридаги низоли вазият қандай ечилишидан қатъий назар ўқув жараёнларини тўлиқ, узилиш ва кечикишсиз ташкил эта олади.

Шундай экан, ISFT институти лицензияси бекор бўлиши тўғрисида негатив фикрлар ва конспирологиялар ҳеч қандай асосга эга эмас.

Шу мунсобат билан,  ISFT институти Раҳбарияти барчаларингиздан бугунги кундаги вазиятда асоссиз ваҳимага берилишдан сақланишингизни ҳамда белгиланган тартибда ўқув жараёнини давом эттиришингизни сўрайди.

Ҳурмат билан,

ISFT институти Раҳбарияти.