2025-yil 27-may kuni ISFT Instituti tomonidan navbatdagi izlanuvchilar qabuli muvaffaqiyatli tarzda tashkil etildi. Qabul quyidagi yo'nalishlarda bo'lib o'tdi: 08.07.07 - Moliya, pul muomalasi va kredit; 08.07.08 - Buxgalteriya hisobi, iqtisodiy tahlil va audit; 19.00.04 - Ijtimoiy falsafa; 19.00.05 - Ijtimoy psixologiya. Etnopsixologiya; 19.00.06 - Yosh va pedagogik psixologiya. Rivojlanish psixologiyasi.  

    Qabul jarayoni suhbat shaklida o‘tkazildi. Suhbat davomida ilmiy izlanishlar olib borish istagini bildirgan talabgorlarning ilmiy faoliyatga bo‘lgan munosabati, tanlagan mavzulari bo‘yicha bilim darajasi, metodologik tayyorgarligi, tahliliy fikrlash salohiyati va mustaqil izlanish olib borish qobiliyati sinovdan o‘tkazildi. Har bir nomzod o‘zining ilmiy g‘oyasini asoslab berish va ilmiy izlanish strategiyasini bayon etish orqali suhbat komissiyasi e’tiborini qozonishga harakat qildi.

   Suhbat natijalari bo‘yicha yuqori natija ko‘rsatgan izlanuvchilar ISFT instituti huzuridagi mustaqil tadqiqotchilar safiga qabul qilindi. Endilikda ular o‘z yo‘nalishlari bo‘yicha ilmiy tadqiqot olib borish, dissertatsiya loyihalari ustida ishlash va ilg‘or ilmiy metodlardan foydalanish imkoniyatiga ega bo‘ladilar. Shuningdek, institut tomonidan yaratilgan ilmiy-metodik baza, tajribali ilmiy rahbarlar bilan hamkorlik va ilmiy seminarlar orqali ularning ilmiy salohiyatini yanada rivojlantirish ko‘zda tutilgan.

    Ushbu qabul ISFT institutining ilmiy-tadqiqot faoliyatini yanada rivojlantirish, yosh va iste’dodli izlanuvchilarni qo‘llab-quvvatlash, hamda milliy va xalqaro miqyosda raqobatbardosh ilmiy kadrlar tayyorlashga bo‘lgan intilishini yaqqol namoyon etdi.