International School of Finance Technology and Science Instituti (ISFT) o‘z tarixidagi muhim bosqichni zabt etdi — institut ilk bor Times Higher Education (THE) Sustainability Impact Ratings 2026 reytingidan munosib o‘rin egalladi. Ushbu yutuq ISFTni Birlashgan Millatlar Tashkilotining Barqaror rivojlanish maqsadlari (SDG)ga qo‘shayotgan amaliy hissasi baholanadigan dunyoning nufuzli oliy ta'lim muassasalari qatoriga olib chiqdi.

ISFT umumiy natijalar bo‘yicha 601–800 oralig‘ida qayd etildi. Bu natija nafaqat institutning ta'lim va ilmiy faoliyatini, balki mas'uliyatli boshqaruv tamoyillariga sodiqligi, inklyuziv ta'limni rivojlantirish va jamiyat bilan samarali hamkorlikni yo‘lga qo‘yish borasidagi izchil sa'y-harakatlarini ham aks ettiradi.

Alohida e'tiborga loyiq jihat shundaki, ISFT BRMning beshta yo‘nalishi bo‘yicha ham yuqori natijalarga erishdi.

BRM 4 – Sifatli Ta'lim yo‘nalishida institut 401–600 o‘rinni egallab, barcha uchun ochiq va yuqori sifatli ta'lim imkoniyatlarini yaratish borasidagi faoliyatining xalqaro e'tirofiga sazovor bo‘ldi.

BRM 5 – Gender Tengligi bo‘yicha 301–400 o‘rinni egallashi institutda teng imkoniyatlar, inklyuziv muhit va adolatli siyosat tamoyillari izchil amalga oshirilayotganini tasdiqlaydi.

BRM 8 – Munosib Mehnat va Iqtisodiy O‘sish yo‘nalishida 601–800 natijasi ISFTning zamonaviy mehnat bozori talablariga javob beradigan malakali mutaxassislarni tayyorlashdagi hissasini e'tirof etadi.

BRM 12 – Mas'uliyatli Iste'mol va Ishlab Chiqarish bo‘yicha 301–400 o‘rinni egallashi institutda barqaror kampus boshqaruvi va barqaror rivojlanish tamoyillarini o‘quv jarayoniga integratsiya qilish borasidagi sa'y-harakatlarning natijasidir.

BRM 17 – Maqsadlar yo‘lida hamkorlik yo‘nalishida 401–600 o‘rinni qo‘lga kiritishi esa ISFTning milliy va xalqaro akademik hamda ijtimoiy hamkorliklari tobora kengayib borayotganidan dalolat beradi.

THE Sustainability Impact Ratings dunyo universitetlarini Barqaror rivojlanish maqsadlariga qo‘shayotgan hissasi asosida baholaydigan eng nufuzli va keng qamrovli xalqaro reytinglardan biri hisoblanadi. ISFTning ushbu reytingga ilk bor kiritilishi institutning barqaror rivojlanish yo‘lidagi sa'y-harakatlari xalqaro miqyosda e'tirof etilayotganining yaqqol tasdig‘idir.

Mazkur yutuqqa erishishda o‘zining fidokorona mehnati va kundalik hissasini qo‘shgan professor-o‘qituvchilarimiz, xodimlarimiz hamda talabalarimizga samimiy minnatdorlik bildiramiz.

Bu — yo‘limizning ilk muhim qadami, xolos. Kelgusi yillarda Barqaror rivojlanish maqsadlarining barcha yo‘nalishlari bo‘yicha natijalarimizni yanada yaxshilash, barqaror rivojlanish tamoyillarini ISFT faoliyatining ajralmas qismiga aylantirish va xalqaro maydondagi mavqeimizni yanada mustahkamlash yo‘lida izchil harakat qilishda davom etamiz.